Sabir Waseem
jo ḳhvab mere nahin the main un ko dekhta tha
isi liye aankh khul ga.i thi isi liye dil dukha hua tha
udasiyon se bhari hui iltija suni thi
kisi nagar men koi kisi ko pukarta tha
vo ik sada thi ki haft-alam men gunjti thi
na-jane kaise koi kisi se bichhaḌ gaya tha
ajiib hairat bikherte the vo dastan-go
ki shab ne jaane se saaf inkar kar diya tha
guzishtagan ko bhi ye gila tha suna hai main ne
suna hai un ko bhi ism-e-azam nahin mila tha
faza sunahri thi rang phaila tha chaar janib
ki chand se vo zamin pe jaise utar raha tha
safar ke aḳhir pe sham.en raushan si ho ga.i thiin
koi masarrat ki sab hadon se guzar gaya tha
Leave a Reply