jo is tarah liye phirta hai jaan hatheli par
vo dekhna kabhi jaan se guzar hi ja.ega
ḳhayal hai koi uḌta hua parind nahin
jahan bhi ja.ega be-bal-o-par hi ja.ega
ye asman jo azal se siva rahe mujh par
ye bojh bhi kahin sar se utar hi ja.ega
main us ka chahne vaala huun koi ghair nahin
vo mere samne aa kar nikhar hi ja.ega
vo kab kahega ki main ne laga.i thi ye aag
vo jab bhi samna hoga mukar hi ja.ega
khila hua hai nazar men gul-e-ḳhayal koi
‘ḳhalil’ aankh jo jhapki bikhar hi ja.ega
Leave a Reply