Riyaz Khairabadi
jo ham aae to botal kyuun alag pir-e-mughan rakh di
purani dosti bhi taaq par ai mehrban rakh di
qafas men shakh-e-gul sayyad ne ai asman rakh di
bana kar shakh-e-gul haan teri shakh-e-kahkashan rakh di
ye kaisi aag bhar kar jaam men pir-e-mughan rakh di
jo todi mehr-e-saghar se to kuchh utha dhuan rakh di
zara chheda jo us ne ho gai aisi za-khud-rafta
ki sham-e-bazm ne gul-gir ke lab par zaban rakh di
khuda ke haath hai bikna na bikna mai ka ai saaqi
barabar masjid-e-jame ke ham ne ab dukan rakh di
chaman ka lutf aata hai mujhe sayyad ke sadqe
qafas men la ke us ne aaj shakh-e-ashiyan rakh di
bina hai ek hi donon ki kaaba ho ki but-khana
utha kar khisht-e-khum main ne vahan rakh di yahan rakh di
ye qais-o-kohkan ke se fasane ban gae kitne
kisi ne tukde tukde sab hamari dastan rakh di
taayyun se munazzah shokhiyan hain us ke jalve ki
hamari vusat-e-dil men bana-e-la-makan rakh di
nazar muddat se thi ai shaikh jis par mai-faroshon ki
vo dastar-e-fazilat rahin ham ne mehrban rakh di
ye kya tha jalva un ka dekhna tha ham ko parde men
laga kar aankh se ham ne jo tasvir-e-butan rakh di
ye aalam hai ‘riyaz’ ek ek qatre ko tarasta huun
haram men ab bhari botal khuda jaane kahan rakh di
Leave a Reply