jo dil-avez hai us zulf-e-girah-gir ki bu
aisi aalam men kisi ki nahin tasir ki bu
ahl-e-jauhar ko miTa sakte hain kab be-jauhar
mushk ki bu ko miTa deti hai kab sair ki bu
dam hamen dene ko aaya hai are ja vaa.iz
munh se aati hai chali tere abhi shiir ki bu
is zamane ke amiron se na rakh chashm-e-husul
kis ne sunghi hai jahan men gul-e-tasvir ki bu
aah ki siiḳh palaT atish-e-gham par jaldi
chali aati hai kabab-e-dil-e-dil-gir ki bu
pahunchi yaqub ko haan pairahan-e-yusuf ki
misr se dam men jo allah ne taqdir ki bu
dam men Dalega mira nala-e-shab-gir nikal
naak ki raah dimagh-e-falak-e-pir ki bu
sach to ye baat hai ai ‘aish’ ki paate hain yahan
tere ash.ar men tarz-e-suḳhan-e-‘mir’ ki bu
Leave a Reply