Poet
jo asman pe ghaTa chha ga.i to kya hoga
yakayak aap ki yaad aa ga.i to kya hoga
abhi to dil hai gham-e-ashiqi se begana
nazar nazar se jo Takra ga.i to kya hoga
rahe jo hosh bhi qaa.em na vaqt-e-nazzara
nigah-e-shauq bhi ghabra ga.i to kya hoga
muhal jur.at-e-iz.har-e-mudda.a na sahi
jo us jabin pe shikan aa ga.i to kya hoga
kahan rahega gulon ka ye naz-e-nik.hat-o-rang
ḳhizan bahar se Takra ga.i to kya hoga
agarche dil men liye hon hazar-ha shikve
nigah-e-yar jo sharma ga.i to kya hoga
mala.ika na karen naaz apne sajdon par
miri jabin ye sharaf pa ga.i to kya hoga
chala huun apne muqaddar ke pech suljhane
vo zulf aur bhi bal kha ga.i to kya hoga
vo baat raaz ki pinhan jo dil men hai ‘nudrat’
darun-e-sher agar aa ga.i to kya hoga
Leave a Reply