jis ki hasrat thi use pa bhi chuke kho bhi chuke
ab kisi chiiz ka ham ko nahin arman hota
shiddat-e-dard hi hoti kahin gharat-gar-e-hosh
baḳht itna to na barham-zan-e-saman hota
chara-gar koshish-e-be-sud hai tadbir-e-ilaj
ham na hote to maraz qabil-e-darman hota
aa hi jaata hai bure vaqt men apnon ko ḳhayal
koi hota jo hamara bhi to pursan hota
puchhte kya ho sabab dafn-e-dil-e-zar ke ba.ad
main musibat-zada ab bhi na hirasan hota
rone valon ko to taqdir se ro baiThe the
ai ajal kaun hamare liye giryan hota
gham ko ab rakhiye kahan ziist kahin ziist bhi ho
ḳhatm qissa hua jis ka ki ye unvan hota
ham to is baat pe raazi the magar ai ‘natiq’
nafs-e-kafir bhi kisi tarah musalman hota
Leave a Reply