azaab raton ḳhizan-ruton ki kahani likkhun
main teri furqat ki sa.aton ko zabani likkhun
bas ek pakiza rabt hai ruh-o-jan ka tujh se
to phir main is saare vaqiye ko gumani likkhun
mujhe mayassar hain saare rishte vahi nahin hai
bhala main kis dil se shauq ki ra.egani likkhun
dua suna hai falak pe ja ke aTak ga.i hai
so tujh ko paane ki kya yunhi ḳhush-gumani likkhun
jo bah rahe hain miri ragon men hain ashk mere
bhala main kaise lahu ki apne ravani likkhun
kabhi jo dariya chaḌha tha dil ka utar chuka hai
to kya main jazbat ke talatum ko faani likkhun
ye mere jivan ke saare mausam bata rahe hain
main apne angan ke har shajar ki javani likkhun
yam-e-tarab aur na e’tibar-e-junun raha hai
so ishq mere tujhe main ḳhuld-ashiyani likkhun
havas-e-ḳhamsa ka silsila bhi yahin talak hai
falak zamin ke jo darmiyan hai makani likkhun
nahin gaya vo kahin bhi ‘anjum’ yahin kahin hai
main shauq ki sab isharaton ke ma.ani likkhun
Leave a Reply