jis ke talib hain vo matlub kahin baith raha
muntazir ham ko bitha khuub kahin baith raha
bas ki likkhi thi main halat dil-e-gum-gashta ki
kho ke qasid mira maktub kahin baith raha
dekhen kya aankh utha kar ki hamen to nahaq
aankh dikhla ke vo mahbub kahin baith raha
shaam se jaise nihan mahr ho so vasl ki raat
munh chhupa kar vo is uslub kahin baith raha
hai miri khana-nashini se ye ghar ghar mazkur
khail-e-ushshaq ka sarkub kahin baith raha
jaana main us ka na aana ki samajh kar vo shokh
baithne ko mire maayub kahin baith raha
bud-o-bash apni kahen kya ki ab us bin yuun hai
jis tarah se koi majzub kahin baith raha
avval-e-ishq men surat ye bani ‘jurat’ ki
ho ke akhir ko vo mahjub kahin baith raha
Leave a Reply