jiina agar jahan men hai aisa kare koi
gham din men khaa.e raat ko roya kare koi
basti men jante hain sabhi ham ko ham hain kya
basti men aaj kyon hamen rusva kare koi
fursat hai kis ko shahr men jo sochta rahe
koi kare bura.i ki achchha kare koi
be-vaqt ki salib pe laTke hue hain aaj
kis munh se dost teri tamanna kare koi
is raah men shajar ki koi chhanv bhi nahin
kab tak safar ki dhuup men bhaTka kare koi
‘shaghil’ ‘adib’ apni ravish hi chalenge ham
badlenge ham zara nahin badla kare koi
Leave a Reply