Jidhar Bhi Dekhiye Ek Rasta Bana Hua Hai

jidhar bhī dekhiye ik rāsta banā huā hai

safar hamāre liye mas.ala banā huā hai

maiñ sar-ba-sajda sakūñ meñ nahīñ safar meñ huuñ

jabīñ pe daaġh nahīñ aabla banā huā hai

maiñ kyā karūñ mirā gosha-nashīn honā bhī

paḌosiyoñ ke liye vāqi.a banā huā hai

magar maiñ ishq meñ parhez se bañdhā huā huuñ

tirā vajūd to ḳhush-zā.eqa banā huā hai

burīda shāḳheñ haiñ yā sham.a-hā-e-gul-shuda haiñ

ḳhamīda peḌ hai yā maqbara banā huā hai

mire gunah dar-o-dīvār se jhalak rahe haiñ

makān mere liye ā.īna banā huā hai

shu.ūrī koshisheñ manzar bigāḌ detī haiñ

vahī bhalā hai jo be-sāḳhta banā huā hai

kisī duā ke liye haath uThe hue ‘shāhid’

kisī diye ke liye tāqcha banā huā hai

Leave a Comment