Shaad Aarfi
jazba-e-mohabbat ko tir-e-be-ḳhata paaya
main ne jab use dekha dekhta hua paaya
jante ho kya paaya puchhte ho kya paaya
sub.h-dam dariche men ek ḳhat paḌa paaya
der men pahunchne par bahs to hui lekin
us ki be-qarari ko hasb-e-mudda.a paaya
sub.h tak mire ham-rah aankh bhi na jhapka.i
main ne har sitare ko dard-ashna paaya
girya-e-juda.i ko sahl janne vaalo
dil se aankh ki janib ḳhuun dauḌta paaya
ehtimam-e-parda ne khol diin na.i rahen
vo jahan chhupa ja kar mera samna paaya
dil ko moh leti hai dil-kashi-e-nazzara
aankh ki ḳhataon men dil ko mubtala paaya
rang laa.i na aḳhir tark-e-naz-bardari
haath joḌ kar us ko mahv-e-iltija paaya
‘shad’ ghair-mumkin hai shikva-e-butan mujh se
main ne jis se ulfat ki us ko ba-vafa paaya
Leave a Reply