Jamal-E-Yar Ko Dekhun Kamal-E-Yar Se Pahle

Neelma Naheed Durrani

jamal-e-yar ko dekhun kamal-e-yar se pahle

main ḳhushbu ki tarah mahkun ḳhayal-e-yar se pahle

karishme husn ke suraj sitare phuul zahir hain

magar main kis taraf dekhun misal-e-yar se pahle

duaon men miri yuun to bahut tasir hai lekin

main us se aur kya mangun saval-e-yar se pahle

hai aadat duur rahne ki agar vo samne aa.e

main sham-e-zindagi chahun visal-e-yar se pahle

sabhi mausam hon ḳhushiyon ke jahan us ka basera ho

zamane ko badal Dalun zaval-e-yar se pahle