jalta huun hijr-e-shahid o yad-e-sharab men
shauq-e-savab ne mujhe daala azaab men
kahte hain tum ko hosh nahin iztirab men
saare gile tamam hue ik javab men
phaili shamim-e-yar mire ashk-e-surkh se
dil ko ghazab fishar hua pech-o-tab men
chin-e-jabin ko dekh ke dil basta-tar hua
kaisi kushud-e-kar kushad-e-naqab men
ham kuchh to bad the jab na kiya yaar ne pasand
ai hasrat is qadar ghalati intikhab men
rahte hain jama kucha-e-janan men khaas o aam
abad ek ghar hai jahan-e-kharab men
aankh us ki phir gai thi dil apna bhi phir gaya
ye aur inqilab hua inqilab men
badnam mere girya-e-rusva se ho chuke
ab uzr kya raha nigah-e-be-hijab men
matlab ki justuju ne ye kya haal kar diya
hasrat bhi ab nahin dil-e-nakam-yab men
goya ki ro raha huun raqibon ki jaan ko
atish zabana-zan hui tufan-e-ab men
nakamiyon se kaam raha umr bhar hamen
piiri men yaas hai jo havas thi shabab men
hai ikhtiyar-e-yar men suud o ziyan magar
fazil the ham jahan se qaza ke hisab men
naseh hai aib-ju o dil-azar is qadar
goya savab hai sukhan-e-na-savab men
donon ka ek haal hai ye muddaa ho kaash
vo hi khat us ne bhej diya kyuun javab men
taqdir bhi buri miri taqrir bhi buri
bigde vo pursish-e-sabab-e-ijtinab men
kya jalve yaad aae ki apni khabar nahin
be-bada mast huun main shab-e-mahtab men
hai minnaton ka vaqt shikayat rahi rahi
aae to hain manane ko vo par itaab men
teri jafa na ho to hai sab dushmanon se amn
badmast ghair mahv dil aur bakht khvab men
paiham sujud pa-e-sanam par dam-e-vida
‘momin’ khuda ko bhuul gae iztirab men
Leave a Reply