Rakhshanda Naved
jaise ji chahe mira hausla parkha jaa.e
duur ik dasht men tanha kahin phenka jaa.e
toḌna aur ka.i baar banana mujh ko
dosto itna bhi asan na samjha jaa.e
rakkha jaa.e mujhe jannat se kisi manzar men
paanv ke niche hi jannat ko na rakkha jaa.e
dekhne vaale hasin aankh bahut dekhte hain
jo pas-e-chashm hai gham us ko bhi dekha jaa.e
main ne kuchh baten farishton ko batani hain abhi
arsh pe aaj usi vaqt bulaya jaa.e
atish-e-vaqt badal Dalegi chehre ke nuqush
ab mire chehre pe kuchh aur na phenka jaa.e
us ki takmil men shamil hai mira puura vajud
ghar ki taḳhti pe mira naam bhi likkha jaa.e
is kahani ka hai ‘raḳhshanda’ yahi lubb-e-lubab
pahle izzat ho to phir ba.ad men chaha jaa.e
Leave a Reply