jab to main huun aah men aisa asar paida karun
ai sitamgar tere dil men apna ghar paida karun
yaan to ye aadat hai kis kis ka karega tu ilaaj
roz bimari se main do chaar agar paida karun
ye taghaful vasl ki shab puchhte hain mera haal
ab duaen maang kar dard-e-jigar paida karun
aankh utha kar jis taraf dekhun vahi aae nazar
aankh vo paida karun aur vo nazar paida karun
fikr se izaon ki ulti suna jaae hain ghair
aisa dil paida karun aur vo jigar paida karun
jo tumhen manzur hai vo kah na do kyuun chup raho
phir khata meri koi hujjat agar paida karun
teri furqat main gavara kar sakunga kis tarah
kis ka dil laun kahan se ye jigar paida karun
haae dil ranjish ka sadma ek-dam uthta nahin
khud manaen vo main itni baat gar paida karun
kuchh ruka dekha jo mujh ko to suna kar ye kaha
ye to achchhi thahri ab logon ka dar paida karun
main hi huun mujh sa agar dhundo jahan men mubtala
tu hi ho tujh sa hasin duniya men gar paida karun
achchha achchha dar ko kar lo band mujh ko dekh kar
sar ko takraun abhi divar-o-dar paida karun
sab kuchh aata hai magar yaan aql hairan hai miri
tere dil men rah kyun-kar fitnagar paida karun
ab tiri jhuti lagavat men na aunga kabhi
muft iiza paun nahaq dard-e-sar paida karun
kahte hain kya tujh pe guzri thi mire jaane ke baad
kya bataun kaise vo vaqt-e-sahar paida karun
kyuun ‘nizam’ us vaqt to tum maan jaoge mujhe
dosti us dushman-e-jan se agar paida karun
Leave a Reply