Saifuddin Saif
jab tasavvur men na pa.enge tumhen
phir kahan DhunDne ja.enge tumhen
tum ne divana banaya mujh ko
log afsana bana.enge tumhen
hasrato dekho ye virana-e-dil
is na.e ghar men basa.enge tumhen
meri vahshat mire gham ke qisse
log kya kya na suna.enge tumhen
aah men kitna asar hota hai
ye tamasha bhi dikha.enge tumhen
aaj kya baat kahi hai tum ne
phir kabhi yaad dila.enge tumhen
‘saif’ yuun chhoḌ chale ho mahfil
jaise vo yaad na a.enge tumhen
Leave a Reply