Mayank Awasthi
jab ḳhud men kuchh mila na ḳhad-o-ḳhal ki tarah
kuchh aa.ine men DhunDh liya baal ki tarah
soi hui hai sub.h ki talvar jab talak
ye shab hai jugnuon ke liye Dhaal ki tarah
kuchh raushni ke daagh ujale ka ek zaḳhm
kuchh to hai shab ke dil men zar-o-mal ki tarah
tahrir kar rahi hai miri past tishnagi
jhilon ko paniyon ke bichhe jaal ki tarah
nagin hai koi bel shajar ba-ḳhabar nahin
kenchul chaḌhi ho tan pe agar chhal ki tarah
phir bhi tamam daagh chhupa.e na chhup sake
go chandni badan pe rahi shaal ki tarah
bas aa.ine se ek mulaqat ke sabab
lamhat ho ga.e hain mah-o-sal ki tarah
tum jhuk ga.e ‘mayank’ zamane ke samne
phulon se aur phalon se ladi Daal ki tarah
Leave a Reply