ankhen khuli hain ḳhvab magar dekh rahi huun
ta-hadd-e-nazar gham ki Dagar dekh rahi huun
lachar huun bebas huun magar dekh rahi huun
luTte hue apna ye nagar dekh rahi huun
is dhuup ki shiddat men kahan saaya milega
girte hue main saare shajar dekh rahi huun
vo jin ke lahu-rang se ye shahr saja hai
ghar un ke hue zer-o-zabar dekh rahi huun
dariya ne hai ruḳh badla baha.ega ye kis ko
ḳhamosh khaḌi is ka safar dekh rahi huun
ik roz ki ye baat nahin meri ‘robina’
sadiyon se main ujḌa hua ghar dekh rahi huun
Leave a Reply