Iftikhar Haidar
jab ek shaḳhs apna Thikana badal gaya
phir us ke saath saara zamana badal gaya
badli nigah-e-naz kisi ḳhush-jamal ne
badla ruḳh-e-kaman nishana badal gaya
barish men tez dhuup nikal aa.i char-su
mausam tha vo jo ḳhuub suhana badal gaya
vo shaḳhs be-sabat ka matlab bata.ega
vo shaḳhs jis ka dost purana badal gaya
hijrat ke saath saath ma.ishat badal ga.i
shajre ke saath saath gharana badal gaya
be-chari laḌkiyon ka bhi kaisa nasib hai
nisbat badal ga.i to Thikana badal gaya
Leave a Reply