jab bhi barish meri a.ankhon men utar jaati hai
badalon men tiri tasvir ubhar jaati hai
Dubna jin ko ho maqsud vo kab sochte hain
mauj kis samt se aati hai kidhar jaati hai
mere ehsas ki bina.i hai ḳhushbu us ki
aag ban kar meri rag rag men utar jaati hai
din vahi din hai jo biite tiri ummid ke saath
shab vahi shab jo tire saath guzar jaati hai
kaisi divar uTha di mire ham-sa.e ne
ab sada aati hai koi na udhar jaati hai
apne atraf andheron ko basa.e rakhiye
raushni in se zara aur nikhar jaati hai
Leave a Reply