Jab Bhi Aankhon Mein Teri Rukhsat Ka Manzar Aa Gaya

jab bhi ankhon men tiri rukhsat ka manzar aa gaya

aftab-e-vaqt neze ke barabar aa gaya

dosti ki jab duhai di to sharq-o-gharb se

haath men patthar liye yaron ka lashkar aa gaya

is safar men go tamazat to bahut thi hijr ki

main tiri yadon ki chhanv sar pe le kar aa gaya

go zamin-o-asman masruf-e-gardish hain magar

jab bhi gardish ka sabab socha to chakkar aa gaya

aadmi ko hashr ke manzar nazar aane lage

us ke qabze men jab ik zarre ka jauhar aa gaya

husn-e-insan dafn ho jaane se mitta hai kahan

phuul ban kar khaak ke parde se bahar aa gaya

ashk jab tapke kisi bekas ki ankhon se ‘nadim’

yuun laga tufan ki zad men samundar aa gaya

Leave a Comment