Jatinder Vir Yakhmi Jayaveer
jaane is men gham ya ḳhushi hai pahli baar mohabbat ki hai
apne liye to baat na.i hai pahli baar mohabbat ki hai
kise bata.en kis se puchhen kyuun ye taḌap har dam rahti hai
kaise kahen ye ḳhush-ḳhabari hai pahli baar mohabbat ki hai
be-sudh sa rahta huun main kyuun bhuul gaya apnon ghairon ko
ik bas un ki yaad bachi hai pahli baar mohabbat ki hai
milne par bhi pabandi hai log kahen ye ḳhud-gharzi hai
is men hamari kya ghalati hai pahli baar mohabbat ki hai
sun rakkha hai be-shak ham ne log nahin denge ab jiine
duniya kar le jo karti hai pahli baar mohabbat ki hai
Leave a Reply