jaan dena bas ek ziyan ka sauda tha
rah-e-talab men kis ko ye andaza tha
ankhon men didar ka kajal daala tha
anchal pe ummid ka taara tanka tha
hathon ki banken chhan chhan chhan hansti thiin
pairon ki jhanjhan ko ghussa aata tha
hava sakhi thi meri, rut ham-joli thi
ham tinon ne mil kar kya kya socha tha
har kone men apne aap se baten kiin
har pahchal par aine men dekha tha
shaam dhale aahat ki kirnen phuti thiin
suraj duub ke mere ghar men nikla tha
Leave a Reply