itne achchhe ho ki bas tauba bhali
tum to aise ho ki bas tauba bhali
rasm-e-ishq-e-ghair aur main ye bhi ḳhuub
aisi kahte ho ki bas tauba bhali
meri mai-noshi pe saaqi kah uTha
itni piite ho ki bas tauba bhali
vaqt-e-aḳhir aur ye qaul-e-vafa
dam vo dete ho ki bas tauba bhali
ghair ki baat apne uupar le ga.e
aisi samjhe ho ki bas tauba bhali
main bhi aisa huun ki ḳhaliq ki panah
tum bhi aise ho ki bas tauba bhali
kahte hain ‘muztar’ vo mujh ko dekh kar
yuun taḌapte ho ki bas tauba bhali
Leave a Reply