Sufi
itna hi bahut hai ki ye barud hai mujh men
angara-numa shakhs bhi maujud hai mujh men
poron se nikal aai hai ik barf ki tahni
ai dost yahi atish-e-namrud hai mujh men
har gend ke pichhe koi aata hai hamesha
ye kaun se bachche ki uchhal-kud hai mujh men
gaali nahin achchhi to tumhen pesh karun kya
ik aur bhi jumla sukhan-alud hai mujh men
main dekhta rahta huun ki vo khidki hai khali
ta-hal yahi raunaq-e-be-sud hai mujh men
yunhi to nahin log guzarte mire dil se
lagta hai koi manzil-e-maqsud hai mujh men
Leave a Reply