akhgar-mushtaq-raheem-aabadi

Itna Bhi Nahin Karte Inkar Chale Aao

itna bhi nahin karte inkar chale aao

sau baar bulaya hai ik baar chale aao

hon fasle naqshon ke ya farq hon shahron ke

dil se to nahin duuri sarkar chale aao

ik muntazir-e-va.ada bedar to hai kab se

ho jaae muqaddar bhi bedar chale aao

andesha-e-rusvai kyuun raah men haail ho

kar lenge zamane ko hamvar chale aao

ta-chand vahi ranjish lillah idhar dekho

lo jurm ka karte hain iqrar chale aao

be-kaifi-e-mausam ka ye uzr hai be-ma.ani

lag jaenge phulon ke ambar chale aao

is abla-pai men ḳharon ki shikayat kya

kuchh ḳhaar bhi hain aḳhir haqdar chale aao

jab chal hi paḌe ‘aḳhgar’ phir fikr koi kaisi

jis tarah bane ab to sarkar chale aao

More Poems

Leave a Comment