ishq ne da.era bana rakkha
raqs men phir mujhe sada rakkha
nim-ḳhvabida us ki ankhon pe
hosh valon ne sab luTa rakkha
ḳhana-e-dil men dhaḌkanon ne sada
vird bas la ilaha ka rakkha
main ne puchha jo apne baare men
us ne phulon men aa.ina rakkha
diip rakkhe hain chaar samton men
panchven dar pe dil jala rakkha
ham ne ta-umr teri rahon men
farsh-e-dil aur jaan bichha rakkha
ishq men ashna paraston ne
ik sanam ek hi ḳhuda rakkha
vaqt-e-ruḳhsat tha mujh men bain magar
qahqahe ne bharam mira rakkha
sang-bari men vo bhi shamil tha
taḳht par jis ko tha biTha rakkha
niila paḌne laga badan mera
astin men ye tu ne kya rakkha
phir thaki haari ek ḳhvahish ne
zanu-e-shab pe sar ko ja rakkha
us pe marti jo na to kya karti
jis ne apna mujhe sada rakkha
ham bhi tasvir se nikal aa.e
us ne bhi bazuon ko va rakkha
ruuh ki be-qarari par tu ne
haath rakkha ki mo.ajiza rakkha
kasa-e-dil men ik savali ne
chuum kar ek naqsh-e-pa rakkha
mere malik ki mehrbani ne
mujh pe tauba ka dar khula rakkha
ek sukha hua shajar ‘jina’
gham ne tere hara-bhara rakkha
Leave a Reply