ishq ki allah ri dushvariyan
ik junun aur laakh zimmedariyan
ehtimam-e-zindagi-e-ishq dekh
roz mar jaane ki hain tayyariyan
ishq ka gham vo bhi tere ishq ka
kaun kar sakta miri gham-ḳhvariyan
be-ḳhudi-e-ishq jaise gham ki niind
gham ki ninden ruuh ki bedariyan
ik junun-e-ishq par qurban hain
hikmat-o-irfan ki sau hushyariyan
ishq bhi hai kis qadar bar-ḳhud ghalat
un ki bazm-e-naz aur ḳhuddariyan
chhuT kar rah jaa.en nabzen ishq ki
sahal ho jaa.en agar dushvariyan
ye niyaz-e-arzumandi na dekh
aur kuchh hain ishq ki ḳhuddariyan
ik nigah be-niyaz-e-ishq tak
husn ki hain sab ghalat-pindariyan
ai javani ai mohabbat marhaba
phir na ye ninden na ye bedariyan
iḳhtilaj-e-qalb ke daure nahin
ishq ki ‘bismil’ hain dil-azariyan
Leave a Reply