Poet
ishq ke shahr ki kuchh ab-o-hava aur hi hai
us ke sahra ko jo dekha to faza aur hi hai
tujh se kuchh kaam nahin duur ho aage se nasim
va kare ghuncha-e-dil ko vo saba aur hi hai
nabz par meri abas haath tu rakhta hai tabib
ye maraz aur hai aur is ki dava aur hi hai
gul to gulshan men hazaron nazar aa.e lekin
us ke chehre ko jo dekha to safa aur hi hai
zahido vird-vaza.if se nahin hasil-e-kar
jis ko ho husn-e-ijabat vo dua aur hi hai
ai jaras harza-dira ho na tu itna chup rah
pahunche pas-manda ba-manzil vo sada aur hi hai
mohtasib ham se abas kiina rakhe hai ‘hatim’
jo nasha ham ne piya hai vo nasha aur hi hai
Leave a Reply