ishq ke asar hain phir ghash mujhe aaya dekho
phir koi rauzan-e-divar se jhanka dekho
un ke milne ki tamanna men mita jaata huun
nai duniya hai mire shauq ki duniya dekho
tuur par hi nahin nazzara-e-janan mauquf
dekhna ho to vo maujud hai har ja dekho
asar-e-nala-e-ashiq nahin dekha tum ne
thaam lo dil ko sambhal baitho ab achchha dekho
taur majnun ki nigahon ke batate hain hamen
isi laila men hai ik dusri laila dekho
partav-e-mehr se maamur hai zarra zarra
lahren leta hai har ik qatre men dariya dekho
duur ho jaaen jo ankhon se hijabat-e-dui
phir to dil hi men do-alam ka tamasha dekho
sab men dhunda unhen aur ki to na ki dil men talash
nazar-e-shauq kahan khaai hai dhoka dekho
nahin thamte nahin thamte mire aansu ‘bedam’
raz-e-dil un pe hua jaata hai ifsha dekho
Leave a Reply