Poet
ishq ka shor karen koi talabgar to ho
jins bazar men le jaa.en ḳharidar to ho
hijr ke soḳhta-jan aur jalenge kitne
tuur par baiThe hain kab se tira didar to ho
shiddat-e-dard do-pal ke liye kam hota ki
gham ke alfaz ke singar men iz.har to ho
kab se ummid laga.e hue baiThe hain ham
ne sahi gar nahin iqrar so inkar to ho
kufr ehram ke parde men chhupa dekha hai
ek aalam hai agar darpai zunnar to ho
ham ne maana ki sharafat hai baḌi chiiz magar
kuchh zamane ko sharafat se sarokar to ho
ḳhana-e-dil men nahin ek kiran ka bhi guzar
saari duniya hai agar matla-e-anvar to ho
razdari hi men hota hai sharifon ka hisab
tujh ko manzur hai gar bar-sar-e-bazar to ho
Leave a Reply