Syed Masood Hasan Masood
ishq ka ‘mas.ud’ ye anjam hai
main huun dil hai hasrat-e-nakam hai
puchhte kya ho ki ab kya kaam hai
mashghala aahon ka sub.h-o-sham hai
main huun aur vo saqi-e-gulfam hai
mai hai gulshan hai subu hai jaam hai
mar ke hijr-e-yar men paaya sukun
ab to bas aram hi aram hai
sham-e-furqat hai javab-e-sub.h-e-hashr
jan-sitan ab durd-e-mai-asham hai
us ke kuche men liye jaata hai phir
kaisa divana dil-e-nakam hai
dekhiye un ka taghaful to zara
puchhte hain aap ka kya naam hai
qaid-o-bandish hai hamare vaste
varna is mahfil men izn-e-am hai
is suḳhan-sanji se ai ‘mas.ud’ aaj
dahr men mash.hur tera naam hai
Leave a Reply