Sufi
ishq janmon ka hai safar shayad
ḳhatm hoga na umr bhar shayad
aaj kachcha ghaḌa hai naav miri
paar lag ja.un duub kar shayad
harf-e-matlab suna ke ro dena
kaam kar jaae chashm-e-tar shayad
ḳhud ko ham barha pukar aae
aaj ham bhi nahin the ghar shayad
aur karni hai justuju apni
aur phirna hai dar-ba-dar shayad
kaun pagal ko ku-ba-ku dhunde
phir raha ho nagar nagar shayad
shab gae uTh ke yaad kar us ko
yuun duaon men ho asar shayad
aa ke manzil pe so gaya raahi
ḳhatm hai bas yahin safar shayad
ban sanvar kar raha karo ‘hasrat’
us ki paḌ jaae ik nazar shayad
Leave a Reply