Poet
is tarah ji raha huun tire astan se duur
jaise ho andalib gul-o-gulsitan se duur
kis tarah ji rahe hain qafas men na pochhiye
dil ashiyana men hai nazar ashiyan se duur
sho.alon se khelne ka saliqa na ho jinhen
vo ashiyan bana.en kahin gulistan se duur
gum-karda-rah ban ga.e jab mir-e-karvan
jo rahbar the rahne lage karvan se duur
rahta zamana teri haqiqat se be-ḳhabar
rahti miri jabin jo tire astan se duur
ai ham-nashin hazar kushada zamin sahi
jaa.en bhi ham to jaa.en kahan asman se duur
ik mehrban mile the bahut din ki baat hai
rahne laga huun jab se har ik mehrban se duur
ḳhashak-e-ashiyan men bhi hain bijliyan nihan
ai barq-e-be-qarar zara ashiyan se duur
phulon ko haath bhi na laga paa.e umr bhar
ham gulsitan men rah ke rahe gulsitan se duur
‘talib’ unhin ke dam se hai tauqir-e-zindagi
rakhte hain apne sar ko jo har astan se duur
Leave a Reply