Zubair Rizvi
chhoḌ kar ghar ki faza ra.ana.iyan pachhta ga.iin
raston ki dhuul men ara.ishen kajla ga.iin
kis ne phaila di mire angan men chadar dhuup ki
mere mahtabon ki saari suraten kumhla ga.iin
apna tanha aks pa kar main ne kankar phenk di
sat.h-e-sahil par ka.i parchha.iyan lahra ga.iin
muddaton ke ba.ad ji chaha tha chhat par soiye
raat pahlu men na leTi thi ki bunden aa ga.iin
kucha kucha kaTte phirte hain yadon ka likha
dil ko jaane kya tiri rusva.iyan samjha ga.iin
duur tak koi na aaya un ruton ko chhoḌne
badalon ko jo dhanak ki chuḌiyan pahna ga.iin
shaam ki dahliz par Thahri hui yaden ‘zubair’
gham ki mehrabon ke dhundle a.ine chamka ga.iin
Leave a Reply