Gautam Rajrishi
is baat ko vaise to chhupaya na gaya hai
sab ko ye magar raaz bataya na gaya hai
parde ki kahani hai ye parde ki zabani
bas is liye parde ko uThaya na gaya hai
hain bhed ka.i ab bhi chhupe qaid rapaT men
kuchh naam the shamil so dikhaya na gaya hai
ambar ki ye sazish hai ajab chand ke badle
duuje kisi suraj ko ugaya na gaya hai
harfon ki zabani ho bayan kaise vo qissa
likkha na gaya hai jo sunaya na gaya hai
kuchh ahl-e-zaban aa.e to hain dene gavahi
ankhon se magar ḳhauf ka saaya na gaya hai
ye raat hai naraz jo dekha ki hava se
do ek charaghon ko bujhaya na gaya hai
Leave a Reply