Ameer Qazalbash
in sarabon se guzarne de mujhe
ungliyan ret men bharne de mujhe
jis nadi paar na utra koi
us nadi paar utarne de mujhe
koi sayyah mujhe DhunDhega
ik jazira huun ubharne de mujhe
yuun na be-zar ho itna ḳhud se
tera chehra huun sanvarne de mujhe
dekh be-manzari-e-manzar ko
kam se kam rang to bharne de mujhe
ru-ba-ru mujh ko kabhi la mere
apne hi aap se Darne de mujhe
shukr kiije ki shikayat kiije
vo na jiine de na marne de mujhe
raah mat rok ki mushkil hai bahut
bahta paani huun guzarne de mujhe
ek aisa bhi shajar ho jo ‘amir’
apne saa.e men Thaharne de mujhe
Leave a Reply