Poet
idhar bhi kabhi charagar dekh lena
hara kyon hai zaḳhm-e-jigar dekh lena
ujale yahin aa ke dam toḌte hain
kabhi shaam ko mera ghar dekh lena
giran tujh pe guzre na meri rifaqat
kaḌe kos hain ham-safar dekh lena
nahin aarzi dil ki gham-parvari kuchh
yunhi apni hogi basar dekh lena
ye hangama-e-qasr-e-parvez ai dil
rahega faqat raat bhar dekh lena
bapa hashr kar dega rahat-kadon men
mire ranj-o-gham ka asar dekh lena
sitamgar ka jashn-e-ramish-gari hai
faqat ek raqs-e-sharar dekh lena
shabistan-e-ishrat men jo parda-gar hain
vahi honge phir parda-dar dekh lena
fasana mira ghaur se sun raha tha
hai nam chashm-e-najm-e-sahar dekh lena
Leave a Reply