Iblagh Ke Badan Mein Tajassus Ka Silsila

iblagh ke badan men tajassus ka silsila

tuuta hai chashm-e-ḳhvab men hairat ka aaina

jo asman ban ke musallat saron pe tha

kis ne use zamin ke andar dhansa diya

bikhri hain piili ret pe suraj ki haDDiyan

zarron ke intizar men lamhon ka jhumna

ehram tutte hain kahan sang-e-vaqt ke

sahra ki tishnagi men abul-haul hans pada

ungli se us ke jism pe likkha usi ka naam

phir batti band kar ke use DhunDta raha

shiryanen khinch ke tuut na jaaen tanav se

mitti pe khul na jaae ye darvaza ḳhuun ka

maujen thiin shoalagi ke samundar men tund-o-tez

main raat bhar ubharta raha Dubta raha

alfaz ki ragon se maani nichod le

fasid mavad kaghzi ghode pe Daal aa

Leave a Comment