Ali Manzoor Hyderabadi
husn un ka apne zauq-e-did men paata huun main
samne ho kar vo chhupte hain taḌap jaata huun main
ishrat-e-jalva bhi ho jaa.e jahan hairat-zada
ai ḳhayal-e-dost us manzil pe ghabrata huun main
dekhta huun apne gham-ḳhvaron ki jab be-dardiyan
husn-e-be-parda ki rah rah kar qasam khata huun main
intizar us ka hai kitna jan-gusil kyunkar kahun
ḳhat men jis ka naam hi likh kar taḌap jaata huun main
kab sambhalne degi ghash se un ki chashm-e-barq-pash
muzhda bada-e-be-ḳhudi aate hain vo jaata huun main
be-ḳhayali men kabhi apni zaban-e-hal se
ḳhasta-hali ke maze un ko bhi samjhata huun main
aah ab tak ki nahin sair-e-baharistan-e-dil
ik ḳhayali rau men ai hamdam baha jaata huun main
hairat-afza hai mira ishq-e-mohabbat-afrin
ḳhud hi ab muztar nahin un ko bhi taḌpata huun main
rasta chhoḌ ai taghaful mere ghar aate hain vo
rahbari kar ai tamanna un ke ghar jaata huun main
hairat-e-mashq-e-tasavvur kho na de mujh ko kahin
samne apne tujhe ai dil-nashin paata huun main
la rahi hai un ki chashm-e-lutf ishrat ke payam
dekh ai ‘manzur’ ab kaisa nazar aata huun main
Leave a Reply