husn ke vasvase se bahar mil
tu mujhe aa.ine se bahar mil
rakh bharam kuchh to be-libasi ka
sharm ke da.ere se bahar mil
mavara nazm ki ho bandish se
tu mujhe qafiye se bahar mil
vajd ki kaifiyat men chhu mujh ko
hosh ke da.ere se bahar mil
pyaar ke raag raag rahne de
ishq ke falsafe se bahar mil
abr ki jhonpaḌi se bahar aa
ret ke qafile se bahar mil
khol na taqche ko ujlat men
chain se hausle se bahar mil
ḳhvab ki bargah men hazir ho
niind ke zaviye se bahar mil
khinch le vaqt ki tanabon ko
jism ke fasle se bahar mil
kya kaha jism nochna hai tujhe
shaam ke hashiye se bahar mil
ḳhaak par phenk de anguThi ko
ghar ke is faisle se bahar mil
dekh ja hijr ki musibat men
vasl ke hadse se bahar mil
be-ḳhatar haath thaam ‘rahib’ ka
ḳhauf ke silsile se bahar mil
Leave a Reply