husn ke jalve luTa.e tiri ra.ana.i ne
raaz sab khol diye ek hi angḌa.i ne
rang bhar kar tiri tasvir men jazb-e-gham ka
apni tasvir bana di tire sauda.i ne
vasl-e-mahbub ki tadbir sujha.i mujh ko
haq-parasti ne aqidat ne jabin-sa.i ne
ham ne socha tha ki bujh ja.enge gham ke sho.ale
aa ke kuchh aur hava di unhen purva.i ne
shorish-e-dahr ne begana kiya ḳhud se mujhe
agahi baḳhshi mujhe gosha-e-tanha.i ne
ek ma.asum se chehre pe ra.unat ki numud
haa.e kya zulm kiya alam-e-barna.i ne
gardish-e-vaqt ne maiḳhane men dam toḌ diya
jaane kya chiiz pila di tire sahba.i ne
ruḳh tamashe ka badal Daala achanak aa kar
ek ḳhush-chehra ḳhush-andaz tamasha.i ne
charḳh aapas ke ta.alluq ka ye andaz bhi dekh
kar diya un ko bhi rusva miri rusva.i ne
Leave a Reply