Husn Ai Jaan Nahin Rahne Ka

Poet

husn ai jaan nahin rahne ka

phir ye ehsan nahin rahne ka

nazr ki jeb to ai josh-e-junun

ab ye daman nahin rahne ka

parda mat munh se uthana yakbar

mujh men ausan nahin rahne ka

tu chala aur ye ji is tan men

kisi unvan nahin rahne ka

gul ko kya roti hai tu ai bulbul

ye gulistan nahin rahne ka

dam ka mehman huun main ab bhi tu

aa ke mehman nahin rahne ka

nabdi mai aur gulistan men gul

tere qurban nahin rahne ka

ab bhi aana hai to aa varna myaan

ye bhi saman nahin rahne ka

dil ki darkhvast jo ki tu ne to yaan

ab ye ik aan nahin rahne ka

aise men apni amanat le ja

phir tujhe dhyan nahin rahne ka

hijr ke gham se na ghabra ‘jurat’

itna hairan nahin rahne ka