ham ne phulon ko jo dekha lab-o-ruḳhsar ke ba.ad
phuul dekhe na ga.e husn-e-ruḳh-e-yar ke ba.ad
kaam nazron se liya abru-e-ḳhamdar ke ba.ad
tiir maare mujhe us shoḳh ne talvar ke ba.ad
jis pe ho jaa.en fida koi bhi aisa na mila
saikḌon dekhe hasin aap ke didar ke ba.ad
dilruba.i ki ada yuun na kisi ne paa.i
mere sarkar se pahle mire sarkar ke ba.ad
zindagi maut se kuchh kam na thi ai jan-e-hayat
tere iqrar se pahle tire inkar ke ba.ad
dil-o-jan kar ke fida un ko banaya apna
ishq ke khel men jiit apni hui haar ke ba.ad
chain phir aur kahin pa na sake ai ‘purnam’
ham zamane men phire kucha-e-dildar ke ba.ad
Leave a Reply