vo bekali nahin dil ko vo iztirab nahin
tumhare hijr ka ab kuchh mujhe itaab nahin
jala-bhuna huun mujhe ḳhvahish-e-kabab nahin
pila de dho ke subu hi agar sharab nahin
suna hai ham ne ki aariz pe hai ghubar sa kuchh
bala se ḳhat ka hamare agar javab nahin
tiri ḳhabar ke liye dekhte hain sab aḳhbar
mutale.a men kisi ke koi kitab nahin
rasida buud bula.e vale ba-ḳhair guzasht
tumhari zulf se ḳhatir ko pech-o-tab nahin
pilana taul ke bada-e-mughan ḳhuda ke liye
ye din sharaf ke hain mizan men aftab nahin
farar kyuun na ho har roz jan-nisar ik ek
huzur aap ki vo daulat-e-shabab nahin
tumhare zulf ki tasvir kya kare sairab
ḳhata muaaf ho ham tishna-e-sarab nahin
‘nasim’ pi ga.e ab mai-kadon men hai kya ḳhaak
dava ke vaste london men bhi sharab nahin
Leave a Reply