Sajida Zaidi
ham ne ik umr men kya kya na jahan dekhe hain
asman dekhe hain aur qaar-e-nihan dekhe hain
jin ki baton men tajalli thi khamoshi men tilism
vahi arbab-e-hunar sokhta-jan dekhe hain
naghma-o-sher-o-zaban ahl-e-siyasat ke qatil
puuri tahzib ke mitne ke nishan dekhe hain
iqitdar-o-havas-o-shor-o-munafiq-nazari
jin ka sheva raha vo pir-e-mughan dekhe hain
jins-e-arzan ki tarah bikte hue ahl-e-qalam
ishtiharon men saje gul-badnan dekhe hain
jin se tarikh ke safhat bhi jaag uthte the
vo zamane vo fasane guzaran dekhe hain
vo hikayat raqam kiin ki qalam khuun roya
har rag-e-tak pe zakhmon ke vahan dekhe hain
ek ik harf se raushan hue jaate the ufuq
aaine sehr-e-dabistan men nihan dekhe hain
jin ki jadu-asari tana-e-ahabab bani
vo tilismat likhe harf-o-bayan dekhe hain
jin ki taabir men ik umr ganva di ham ne
raaz vo sina-e-giti men nihan dekhe hain
jalte bam-o-dar-o-divar sulagte hue shahr
jin se pathra gaiin ankhen vo saman dekhe hain
asman-gir the shoale khas-o-khashak the jism
qaid-e-be-jurm men sab pir-o-javan dekhe hain
dil ne har zarra ke hamrah dhdakna sikha
tab navaon men ye maani ke jahan dekhe hain
Leave a Reply