Hum Soch Rahe the Un Ko Abhi Wo Parda uTha Kar Aa Bhi Gae

Suhail Kakorvi

ham soch rahe the un ko abhi vo parda uTha kar aa bhi ga.e

vo phuul mohabbat ke ham par az-rah-e-karam barsa bhi ga.e

aa.e the ilaj-e-dil karne fitrat ke mutabiq kaam kiya

kuchh aur baḌhaya dard mira vo aur mujhe taḌpa bhi ga.e

ummid dila.i saaqi ne aa.egi ghaTa to dekhenge

qismat ne hamara saath diya be-mausam badal chha bhi ga.e

kuchh naam liye kuchh dard kahe ruḳhsat hue le kar mera sukun

afsane suna.e mujh ko na.e vo aag na.i bhaḌka bhi ga.e

qurbat men bahut se imkan hain ye baat samajh men aa.i hamen

halat se vo majbur hue halat se dhoka kha bhi ga.e

main ne to ‘suhail’ apne dil ki mauhum tamanna zahir ki

ruḳhsar pe bijli si chamki is baat pe vo iThla bhi ga.e