Samad Ansari
ham ruh-e-ka.enat hain naqsh-e-asas hain
ham vaqt ka ḳhamir zamane ki baas hain
tanha hain ham tamam na qurbat na fasle
ham aap ke qarib na ham apne paas hain
kab se Tange hue hain ḳhalaon ke aas paas
kab se ye asman ke sitare udaas hain
ḳhud haT ga.e hain duur vo paani ke zor se
dariya ke vo kinare jo dariya-shanas hain
ḳhud-rav hain ham hamen na ḳhizan se Dara.iye
sahra ke mast phuul hain jangal ki ghaas hain
kitni baharen aa ke chaman se guzar ga.iin
ham hain ki ek gul ke liye mahv-e-yas hain
jin ke badan pe atlas-o-kamḳhab hai ‘samad’
sach puchhiye to log vahi be-libas hain
Leave a Reply