ham phire shahr men avara-o-rusva barson
dil ke mandir men tire vahm ko puuja barson
vo badan chand ke jaisa tha mire aks ke saath
din ki raunaq men bhi ik ḳhvab sa dekha barson
qurb ne khol diye husn ke uqde saare
zindagi khati rahi ishq ka dhoka barson
ab to hansne ki ijazat gham-e-dauran de de
vaqt ro ro ke bahut ham ne guzara barson
koi aisa na mila jis se ḳhabar kuchh milti
apna haal apni hi tasvir se puchha barson
ab nahin taab ki sadmat ki yurish jhele
talḳhiyan hoti rahin dil ko gavara barson
ye alag baat ki raas aaya tira gham ham ko
varna ghere raha yuun to gham-e-duniya barson
us se puchho ki hai kya kaif-e-shikast-e-ummid
jis ne jhela hai gham-e-va.ada-e-farda barson
ek ma.asum lagavaT thi ki jis ki ḳhatir
dil ko marghub rahi ranjish-e-beja barson
tum ki har saans men har aah men har ḳhvab men the
phir bhi ham apne ko paate rahe tanha barson
aql suljha na saki uljhe masa.il ‘qadir’
aankh ne dekha hai qismat ka tamasha barson
Leave a Reply