ham naqsh-e-pa the rahguzar hi men rah ga.e
nikle safar pe aur safar hi men rah ga.e
shayad unhen tha hadisa-e-zabt-e-gham ka Dar
aansu laraz ke dida-e-tar hi men rah ga.e
manzil pe vo bhi pahunchenge kis ko yaqin ho
pichhe jo ibtida-e-safar hi men rah ga.e
saare javab de na sake zindagi ke ham
kitne saval dida-e-tar hi men rah ga.e
parvaz un ke saath kare ashiyan ki ḳhaak
vo bal-o-par jo barq-o-sharar hi men rah ga.e
dahliz ke charagh ka ‘saulat’ ḳhayal tha
manzil ka shauq le ke bhi ghar hi men rah ga.e
Leave a Reply